دۆناڵد ترەمپ: هێزە ئاسمانی و دەریاییەکانی ئێران بە تەواوی پەککەوتوون
سێشەممە، 24ی ئاداری 2026، دۆناڵد ترەمپ، سەرۆکی ویلایەتە یەکگرتووەکانی ئەمریکا، لە ڕاگەیێندراوێکی نوێدا ئاستی سەرکەوتنە سەربازییەکانی وڵاتەکەی لە دژی ئێران ئاشکرا کرد. ترەمپ جەختی کردەوە کە هێزە چەکدارەکانی ئێران هەموو توانا جەنگییەکانیان لەدەستداوە و ئێستا فڕۆکە ئەمریکییەکان بە تەواوی بە ئازادی بەسەر ئاسمانی تاراندا دەسووڕێنەوە.
سەرۆکی ئەمریکا ئاماژەی بەوە کرد کە تەکنۆلۆژیای سەربازیی واشنتن باڵادەستیی خۆی سەلماندووە، دوای ئەوەی هێزەکانی ئێران 101 مووشەکیان ئاراستەی کەشتیی فڕۆکەهەڵگری "ئەبراهام لینکۆڵن" کردووە، بەڵام سەرجەمیان لە ئاسماندا تێکشکێنراون. هەروەها ڕایگەیاند کە تاوەکو ئێستا توانراوە نزیکەی 82%ی سەکۆ مووشەکییەکانی ناو خاکی ئێران لەناو ببرێن.
دانوستانی جددی و گۆڕانکاریی دەسەڵات لە تاران
سەبارەت بە لایەنی دیپلۆماسی، ترەمپ ئاشکرای کرد کە ئێستا لە قۆناغی دانوستانی زۆر جدی دان لەگەڵ سەرکردایەتییەکی نوێ لە ناوخۆی ئێراندا. ترەمپ باسی لە چەند خاڵێکی سەرەکی کرد:
- تیمی دانوستاندکار: جەی دی ڤانس، مارکۆ ڕوبیۆ، جارد کۆشنەر و ستیڤ ویتکۆف ئەندامی تیمی دانوستاندنی ئەمریکان.
- هەڵوەشاندنەوەی پڕۆژەی ئەتۆمی: مەرجی سەرەکیی ئەمریکا بۆ ڕاگرتنی جەنگ، کۆتاییهێنانی یەکجارییە بە بەرنامەی ناوەکیی ئێران.
- ڕاگرتنی بۆردوومان: ترەمپ فەرمانی داوە بۆ ماوەی 5 ڕۆژ بۆردوومانی وێستگەکانی کارەبا ڕابگیرێت وەک دەرفەتێک بۆ سەرکەوتنی گفتوگۆکان.
چارەنووسی سەرکردایەتیی ئێران و ئاژاوەی ناوخۆیی
ترەمپ ئاماژەی بەوە کرد کە دۆخی ناوخۆی ئێران پڕە لە ئاژاوە و پڕۆسەی "گۆڕانکاریی دەسەڵات" بەدیهاتووە. سەبارەت بە چارەنووسی موجتەبا خامنەیی، ترەمپ گوتی: "نازانم هێشتا لە ژیاندا ماوە یان نا، چونکە ئێستا لە ناوخۆی ئێراندا کەس نازانێت کێ فەرماندەیی دەکات." سەرۆکی ئەمریکا جەختی کردەوە کە ئەو سەرکردانەی ئێستا مامەڵەیان لەگەڵ دەکەن، جیاوازن لەوانەی دەستپێکی ململانێکان.
پاراستنی هاوپەیمانان و دیارییەکی نادیار
لە بەشێکی تری قسەکانیدا، ترەمپ باسی لە پاراستنی ئیمارات کرد و ڕایگەیاند کە 1400 مووشەک ئاراستەی ئەو وڵاتە کراوە، بەڵام سیستەمی پاتریۆتی ئەمریکی هەموویانی تێکشکاندووە. هەروەها ئاشکرای کرد کە ئێران "دیارییەکی بەنرخی" پێشکەش بە ئەمریکا کردووە کە پەیوەندی بە دۆسیەی وزە، نەوت و گازەوە هەیە، ئەمەشی وەک ئاماژەیەک بۆ خواستی سەرکردایەتییە نوێیەکەی ئێران بۆ کۆتاییهێنان بە جەنگ ناوبرد.
ترەمپ لە کۆتاییدا ڕایگەیاند: "ئێمە ئەم جەنگەمان بردووەتەوە، هەرچەندە ناتوانم بە دڵنیایی 100% بیڵێم، بەڵام جەنگەکە تەواو بووە."
