پەرلەمانی عێراق کاتی کۆبوونەوەی بۆ هەڵبژاردنی سەرۆککۆمار دیاری کرد
هەیبەت حەلبووسی، سەرۆکی ئەنجوومەنی نوێنەرانی عێراق ڕایگەیاند، ڕۆژی سێشەممە 27ی کانوونی دووەمی 2026، پەرلەمان کۆبوونەوەیەکی تایبەت بۆ هەڵبژاردنی سەرۆککۆماری نوێی عێراق ئەنجام دەدات. ئەم بڕیارە لە کاتێکدایە کە پرۆسەی سیاسی گەیشتووەتە قۆناغی یەکلاکردنەوەی پۆستە سیادییەکان.
سەبارەت بە پشکی کورد لە پۆستی سەرۆککۆمار، تاوەکو ئێستا هەردوو جەمسەرە سەرەکییەکە (پارتی دیموکراتی کوردستان و یەکێتیی نیشتمانیی کوردستان) لەسەر کاندیدێکی هاوبەش ڕێکنەکەوتوون. پارتی "فوئاد حوسێن" و یەکێتی "نزار ئامێدی"یان وەک کاندید بۆ ئەو پۆستە پێشکەش کردووە.
لیستی کۆتایی کاندیدە پەسندکراوەکان
سەرۆکایەتیی پەرلەمانی عێراق لیستی نوێی ئەو کاندیدانەی بڵاوکردەوە کە مەرجە یاساییەکانیان تێدایە بۆ کێبڕکێ لەسەر پۆستی سەرۆکایەتی کۆمار. لیستەکە دوای پەسندکردنی تانەی چوار کاندیدی دیکە لەلایەن دادگای فیدراڵییەوە، ئێستا ناوی 19 کەسایەتی لەخۆدەگرێت.
ناوی ئەو 19 کاندیدەی مەرجە یاساییەکانیان تێدایە:
| 1. شوان حەوێز فەریق | 2. ئەحمەد عەبدوڵڵا تۆفیق | 3. حوسێن تەها شنگالی |
| 4. نەجمەدین عەبدولکەریم | 5. ئاسۆ فەرەیدوون عەلی | 6. سامان عەلی شاڵی |
| 7. سەباح ساڵح سەعید | 8. عەبدوڵڵا محەممەد عەلیاوی | 9. لەتیف محەممەد جەمال ڕەشید |
| 10. ئیقبال عەبدوڵڵا حلیوی | 11. نزار محەممەد سەعید | 12. سەردار عەبدوڵڵا مەحموود |
| 13. فوئاد محەممەد حوسێن | 14. موسەننا ئەمین نادر | 15. نەوزاد هادی مەولوود |
| 16. خالید سدیق عەزیز | 17. ئازاد مەجید حەسەن | 18. رافع عەبدوڵڵا حەمید |
| 19. سالم حەواس عەلی ساعدی | ||
ڕێکارە دەستوورییەکان بۆ هەڵبژاردن
بەپێی ماددەی 70ی دەستووری عێراق، پێویستە پەرلەمان بە زۆرینەی دوو لەسەر سێی دەنگی ئەندامانی (220 دەنگ) سەرۆککۆمار هەڵبژێرێت. ئەگەر هیچ کاندیدێک لە گەڕی یەکەمدا ئەو ڕێژەیەی بەدەستنەهێنا، ئەوا کێبڕکێ لە نێوان ئەو دوو کاندیدە دەکرێت کە زۆرترین دەنگیان هێناوە، لە گەڕی دووەمدا هەرکامیان زۆرترین دەنگی هەبێت، دەبێتە سەرۆککۆماری نوێی وڵات.
ئەم دانیشتنەی پەرلەمان بە یەکلاکەرەوە دادەنرێت بۆ کۆتاییهێنان بە چەقبەستوویی سیاسی و دەسپێکردنی ڕێکارەکان بۆ ڕاسپاردنی کاندیدی گەورەترین کوتلە بۆ پێکهێنانی کابینەی نوێی حکومەت.
