پارێزگاری سلێمانی: دەنگدان بە زاخۆ دەنگدانە بە ئایندەمان
شەوی هەینی کاتی دەنگدان بۆ باشترینەکانی جیهان لە خەڵاتەکانی فیفا بۆ ساڵی 2025 کۆتایی دێت. یانەی زاخۆ هەوڵ دەدات لە شارە جیاوازەکانی کوردستان زۆرترین دەنگ کۆبکاتەوە بۆ بردنەوەی خەڵاتی باشترین هاندەری جیهان.کەمپینی پاڵپشتیکردن لە هەموو پارچەکانی کوردستان
کەمپینی پاڵپشتیکردن لە یانەی زاخۆ لە شار و شارۆچکە جیاوازەکانی هەر چوار پارچەی کوردستان بەردەوامە. هاندەران بە چالاکی دەنگ بۆ یانەکە کۆدەکەنەوە بە مەبەستی یارمەتیدانیان بۆ بردنەوەی خەڵاتی باشترین هاندەری جیهان بۆ ساڵی 2025. یانەی زاخۆ ژمارەیەکی زۆر لە خۆبەخشەکانی خۆی بەسەر شارە جیاوازەکاندا بڵاوکردووەتەوە. ئامانجیان ئەوەیە تا دوایین خولەکی کاتی دەنگدان، بەردەوام بن لە کۆکردنەوەی دەنگ.سەردانی فەرمیی پارێزگاری سلێمانی
بەیانیی ڕۆژی پێنجشەممە، تیمێکی گەورەی خۆبەخشەکانی یانەکە لەگەڵ دڵژار عەدنان، ئەندامی دەستەی کارگێڕیی یانەی زاخۆ، سەردانی هەڤاڵ ئەبوبەکر پارێزگاری سلێمانیان کرد. مەبەستیان دەستپێکردنی فەرمیی کارەکانیان بوو لە سلێمانی بۆ کۆکردنەوەی دەنگ. لە ئاهەنگەکەدا، پارێزگاری سلێمانی خەڵاتێکی تایبەتی دایە یانەی زاخۆ. لە بەرامبەردا، ئەندامی کارگێڕیی یانەکە لۆگۆ و جلوبەرگی یانەکەی بە دیاری پێشکەش بە پارێزگار کرد.قسەکانی پارێزگاری سلێمانی
هەڤاڵ ئەبوبەکر لە کۆنگرەیەکی رۆژنامەوانیدا ڕایگەیاند کە وەک نوێنەر و نموونەیەکی جوان پاڵپشتی یانەی زاخۆ دەکەن. ئەو ئاماژەی بە کاری نایابی یانەکە کرد لە پاڵپشتیکردنی تووشبووانی نەخۆشیی شێرپەنجە، هەروەها گرنگیدانیان بە ژینگە و بابەتە گشتییەکان لەگەڵ وەرزشدا. پارێزگار گوتی: "دەنگمان دەخەینە پاڵ دەنگی ئەوانەی کە دەنگ بە یانەی زاخۆ دەدەن."بانگهێشت بۆ پاڵپشتیی گشتگیر
پارێزگاری سلێمانی جەختی کردەوە کە یانەی زاخۆ کارێکی گەورەیان کردووە و نوێنەری ڕاستەقینەی کوردن. ئەو داوای لە هەموو کوردان کرد بەدوای ئەو دەرفەتانەدا بگەڕێن کە یەکدەخەن، چونکە ئەم بابەتە یەکێکە لەوانە. هەڤاڵ ئەبوبەکر گوتی: "با بەیەکەوە هانی یانەی زاخۆ بدەین بۆ ئەوەی نموونەیەکی جوانی خۆمان پێشکێشی جیهان بکەین."چادری تایبەت لە باخی گشتی سلێمانی
پارێزگار ئاماژەی بەوە کرد کە لە باخی گشتیی سلێمانی چادرێکی تایبەت داناوە بۆ یارمەتیدانی ئەو کەسانەی کە دەیانەوێت دەنگ بە یانەی زاخۆ بدەن. ئەو بانگهێشتی هەموو کەس کرد لە هەر شوێنێک بن، دەنگ بە یانەکە بدەن، چونکە ئەمە دەنگدانە بە رەسانەیەتی کورد، رابردوو و ئایندەیان.کۆتایی کاتی دەنگدان
دەنگدان بۆ باشترینەکانی ساڵی 2025 لەسەر ماڵپەری فیفا شەوی هەینی کاژێر 1:59 بە کاتی باشووری کوردستان کۆتایی دێت. 12 بینین
