گرووپێکی چەکدار بەرپرسیارێتیی تەقینەوەکەی حمس لەئەستۆ دەگرێت

گرووپێکی چەکدار بەرپرسیارێتیی تەقینەوەکەی حمس لەئەستۆ دەگرێت

گرووپێکی چەکدار بەناوی "سەرایا ئەنسارولسوننە" بەرپرسیارێتیی ئەو تەقینەوەیەی گرتەئەستۆ کە ئەمڕۆ لە نێو مزگەوتێکی شاری حمسی سووریا ڕوویدا. گرووپەکە هەڕەشەی بەردەوامبوونی هێرشەکانیشی کردووە.

ڕاگەیاندنی گرووپەکە

سەرایا ئەنسارولسوننە لە ڕاگەیاندنێکدا گوتی: "بە پشتیوانیی خوای گەورە، موجاهیدانی سەرایا ئەنسارولسوننە بە هاوئاهەنگی موجاهیدانی گرووپێکی دیکە، چەندین بۆمبیان لەنێو پەرستگەی عەلی کوڕی ئەبی تاڵیبی سەر بە نوسەیرییەکان (عەلەوییەکان) تەقاندەوە." گرووپەکە بانگەشەی کرد کە ئەم تەقینەوەیە بووەتە هۆی کوژران و برینداربوونی 40 کەس.

وردەکارییەکانی هێرشەکە

ڕۆژی هەینی 26-12-2025، لە کاتی نوێژی هەینیدا، تەقینەوەیەک لە نێو مزگەوتی "ئیمام عەلی کوڕی ئەبو تاڵیب" لە گەڕەکی وادی زەهەب لە شاری حمس ڕوویدا. وەزارەتی ناوخۆی سووریا ڕایگەیاند کە 8 کەس گیانیان لەدەستداوە و زیاتر لە 20 کەسی دیکەش بریندار بوون.

ڕەتکردنەوەی دەنگۆکان

سەرایا ئەنسارولسوننە ئەو دەنگۆیانەی ڕەتکردەوە کە لە میدیاکاندا بڵاوبوونەتەوە کە گوایە تەقینەوەکە مزگەوتێکی سوننەی کردووەتە ئامانج. گرووپەکە جەختی کردەوە کە ئامانجەکە مزگەوتێکی عەلەوی بووە.

هەڕەشەی بەردەوامبوون

گرووپەکە لە ڕاگەیاندنەکەیدا هەڕەشەی کرد: "هێرشەکانمان بەردەوام و زیاتر دەبن و هەموو بێباوەڕان و هەڵگەڕاوەکان دەگرێتەوە."

چۆنیەتیی ئەنجامدانی تەقینەوەکە

بەپێی میدیای فەرمیی سووریا (سانا)، تەقینەوەکە لەڕێگەی بۆمبی چێنراوەوە ئەنجام دراوە کە لە نێو مزگەوتەکەدا دانرابووەوە.

پێکهاتەی مەزهەبیی حمس

حمس شارێکی زۆرینە سوننە مەزهەبە، بەڵام چەندین گەڕەکی عەلەویشی تێدایە. ئەم تەقینەوەیە لە یەکێک لەو گەڕەکە عەلەوییانەدا ڕوویداوە.