ئەحمەد شەرع: ئاگربەست بنەمای ڕێککەوتنمانە لەگەڵ هەسەدە
ئەحمەد شەرع، سەرۆکی قۆناغی ڕاگوزەری سووریا، دوایین پێشهاتەکانی پەیوەندییەکانی نێوان حکومەتی کاتی و هێزەکانی سووریای دیموکراتی ئاشکرا کرد. شەرع جەختی لەوە کردەوە کە بنەمای سەرەکیی ڕێککەوتنی نێوانیان پاراستنی ئاگربەستە، بەو مەرجەی دامەزراوەکانی دەوڵەت بگەڕێنەوە بۆ سەرجەم پارێزگاکانی وڵات.
سەبارەت بە کۆبوونەوەی بڕیارلێدراو لەگەڵ فەرماندەیی گشتیی هەسەدە، ئەحمەد شەرع ڕایگەیاند کە بەهۆی خراپیی کەشوهەواوە نەیانتوانیوە دیدارێکی ڕووبەڕوو لەگەڵ مەزڵووم عەبدی ئەنجام بدەن. لەبری ئەوە، هەردوولا لە ڕێگەی پەیوەندییەکی تەلەفۆنییەوە گفتوگۆیان دەربارەی دۆخی مەیدانی و جێبەجێکردنی ڕێککەوتنەکان کردووە.
بانگەواز بۆ هۆزە عەرەبەکان و چەسپاندنی ڕێککەوتنەکان
سەرۆکی کاتیی سووریا لە پەیامێکدا داوای لە هۆزە عەرەبەکانی ناوچەکە کرد دان بەخۆیاندا بگرن و خۆیان لە هەر کاردانەوەیەکی توند بەدوور بگرن. ئەم بانگەوازە بە مەبەستی ڕەخساندنی زەمینەیەکی گونجاوە تاوەکو ڕێککەوتنە سیاسی و ئەمنییەکان بەبێ ئاستەنگ بگەنە ئەنجام.
ئەم لێدوانانەی شەرع لە کاتێکدایە کە هەوڵە نێودەوڵەتی و هەرێمییەکان بۆ ڕێگریکردن لە پێکدادانی زیاتر لە نێوان سوپای سووریا و هێزەکانی هەسەدە بەردەوامن. جەختکردنەوە لەسەر ئاگربەست وەک هەنگاوێکی سەرەتایی دەبینرێت بۆ گەیشتن بە چارەسەرێکی گشتگیر کە یەکپارچەیی خاکی سووریا بپارێزێت.
