سەرۆکی هەرێم و هەڵسووڕێنەری باڵیۆزخانەی ئەمریکا هەڵبژاردنی پەرلەمانی عێراقیان بە هەنگاوێکی گرنگ ناوبرد
نێچیرڤان بارزانی، سەرۆکی هەرێمی کوردستان لەگەڵ جۆشوا هاریس، هەڵسووڕێنەری باڵیۆزخانەی ئەمریکا لە عێراق کۆبۆیەوە. لە کۆبوونەوەکەدا سەرکەوتنی هەڵبژاردنی ئەنجوومەنی نوێنەرانی عێراق بە هەنگاوێکی گرنگ و ئەرێنی وەسف کرا و جەخت لەسەر بەهێزکردنی پەیوەندییەکان کرایەوە.وردەکارییەکانی کۆبوونەوەی سەرۆکی هەرێم لەگەڵ لایەنی ئەمریکی
بەپێی راگەیێندراوی سەرۆکایەتیی هەرێمی کوردستان، ئەم کۆبوونەوەیە پاشنیوەڕۆی ئەمڕۆ سێشەممە، ٢٥ی ١١ی ٢٠٢٥ لە هەولێر ئەنجام درا. سەرۆکی هەرێم پێشوازی لە هەڵسووڕێنەری باڵیۆزخانەی ئەمریکا و شاندێکی یاوەری لەگەڵیدا کرد. لە میانەی دیدارەکەدا، پەیوەندییەکانی ئەمریکا لەگەڵ عێراق و هەرێمی کوردستان، ئەنجامەکانی هەڵبژاردنی ئەنجوومەنی نوێنەرانی عێراق و داهاتووی پرۆسەی سیاسی لە وڵات تاوتوێ کران. هەروەها دۆخی ناوخۆی هەرێمی کوردستان بەشێک بوو لە گفتوگۆکان.هەڵبژاردنی پەرلەمان هەنگاوێکی ئەرێنی بۆ پرۆسەی سیاسی
هەردوو لایەن بەڕێوەچوون و سەرکەوتنی هەڵبژاردنی ئەنجوومەنی نوێنەرانیان بە هەنگاوێکی گرنگ و ئەرێنی ناساند. ئەوان هیوایان خواست ئەم هەڵبژاردنە ببێتە هۆکاری پێشخستنی پرۆسەی سیاسی لە عێراق و وەڵامدەرەوەی داواکاری و چاوەڕوانییەکانی هاووڵاتییان بێت.جەخت لەسەر بەرژەوەندییە هاوبەشەکان و بەهێزکردنی هاوکاری
لە بەشێکی دیکەی کۆبوونەوەکەدا، هەردوو لایەن هاوڕابوون کە بەرژەوەندی و بەهای هاوبەش، واشنتن لەگەڵ عێراق و هەرێمی کوردستان دەبەستێتەوە. بۆیە جەختیان لەسەر برەودان بە پەیوەندییەکان و بەهێزکردنی هاوکاری لە نێوانیان کردەوە، هەروەها باسیان لە بوارەکانی هاوکاری و هاریکاری لە نێوان دوو لایەن کرد.گفتوگۆ لەسەر دۆخی ناوخۆی هەرێم و پەیوەندییەکانی هەولێر و بەغدا
تەوەرێکی دیکەی کۆبوونەوەی نێچیرڤان بارزانی و شاندە ئەمریکییەکە تایبەت بوو بە دۆخی ناوخۆی هەرێمی کوردستان و پەیوەندییەکانی هەولێر و بەغدا. هەروەها گفتوگۆ لەسەر گرنگیی یەکدەنگیی لایەنە کوردستانییەکان لە هەرێمی کوردستان و عێراق کرا، لەگەڵ باسکردنی دۆخی گشتی ناوچەکە. 13 بینین
